کشمیر جرنلسٹ فورم کی تقریب خلف برداری, وزیراعظم آزادکشمیر کی جانب سے تاریخی پیکج کا اعلان

اسلام آباد
وزیر اعظم آزاد کشمیر سردار تنویر الیاس خان نے کہا ہے کہ آزاد کشمیر کو فلاحی ریاست بنائیں گے،آزاد کشمیر کے عوام کی خدمت ہمارا ایجنڈا ہے،عوامی حقوق پر کوئی سمجھوتہ نہیں کریں گے،حکومت کی خامیوں کی نشاندہی کے لئے مثبت تنقید اور تنقید برائے اصلاح کی حوصلہ افزائی کریں گے،کشمیری صحافیوں کے لئے راولپنڈی،اسلام آباد میں ہائوسنگ سوسائٹی بنائیں گے جبکہ انہوں نےکشمیر جرنلسٹس فورم کے لئے 50 لاکھ روپے گرانٹ اور عمرے کے 10 ٹکٹ اور وفات پاجانے والے ممبران کے خاندانوں کے لئے تین تین لاکھ روپے کا اعلان کیا۔ وہ گزشتہ روز کشمیر جرنلسٹس فورم کی نومنتخب باڈی کی تقریب حلف برداری سے خطاب کررہے تھے۔س موقع پر فورم کے صدر خاور نواز راجہ،سابق صدر زاہد عباسی، سیکرٹری فورم سردارعقیل انجم نے بھی خطاب کیا۔وزیراعظم آزاد حکومت ریاست جموں وکشمیر سردار تنویر الیاس خان کشمیر ہاؤس اسلام آباد میں کشمیر جرنلسٹس فورم کی تقریب حلف برداری سے بطور مہمان خصوصی خطاب کررہے تھے۔وزیراعظم آزاد کشمیر کا تقریب آمد پر شرکاء کی جانب سے والہانہ استقبال کیا گیا۔وزیراعظم آزاد کشمیر نے کشمیر جرنلسٹس فورم کے نو منتخب ممبران سے حلف لیا۔تقریب سے خطاب کرتے ہوئے انہوں نے کہا کہ صحافتی شعبہ سے مجھے ذاتی دلچسپی ہے۔ صحافیوں کے جملہ مسائل سے آگاہ ہوں۔صحافی نامساعد حالات کے باوجود اپنی پیشہ ورانہ ذمہ داری بخوبی انجام دے رہے ہیں۔کشمیر جرنلسٹس فورم نے اچھی جدوجہد کی۔تحریک آزادی کشمیر،آزاد کشمیر کی سیاست اور عوامی مسائل کو اجاگر کرنے میں صحافیوں کا اہم کردار ہے۔وزیراعظم آزاد کشمیر نے اپنے خطاب میں کشمیر جرنلسٹس فورم کے 10 ممبران کو عمرہ ٹکٹ اور فورم کے لیے 50 لاکھ روپے دینے کا اعلان کرتے ہوئے کہا کہ صحافیوں کے لیے ہاؤسنگ سکیم بنائی جائے گی ۔
وزیراعظم آزاد کشمیر نے سینئر صحافی سردار دلپذیر عباسی مرحوم کی فیملی کے لیے 10 لاکھ جبکہ کشمیر جرنلسٹ فورم کے وفات پاجانے والے ممبران سردار شفیق ، رفیق صدیقی ، شیخ لطیف کی فیملیز کے لیے تین تین لاکھ روپے امدادی رقم دینے کا اعلان کیا۔وزیراعظم آزاد کشمیر نے تقریب سے خطاب کرتے ہوئے کہا کہ آزاد کشمیر کی سیاست میں آنے کا واحد مقصد اپنی ریاست کی تقدیر بدلنا ہے۔ ہماری حکومت نے تمام تر مخالفت کے باوجود بلدیاتی الیکشن کا انعقاد ممکن بنایا جو لوگوں کا حق تھا۔وزیراعظم آزاد کشمیر نے کہا کہ ہماری حکومت نے مختصر مدت میں ریاستی عوام کی فلاح وبہبود اور تعمیر و ترقی کے لیے اہم اقدامات کیے ۔جہیز فنڈز اور زکوٰۃ فنڈ میں تاریخی اضافہ کیا
مہاجرین جموں وکشمیر کے گزارہ الاؤنس میں یکمشت 1500 کا اضافہ کیا گیا۔وزیراعظم آزاد کشمیر نے کہا کہ 32 سال بعد میرپور ڈرائی پورٹ منصوبہ کو دوبارہ فعال کر دیا جس سے ہماری معیشت بہتر ہو گی ۔آزاد کشمیر میں پہلی نجی ائر لائن کو لائسنس اجرا کیا گیا جس سے معیشت اور سیاحت کو مزید فروغ ملے گا۔وزیراعظم آزاد کشمیر نے کہا کہ بدقسمتی سے ہمارے ہاں سب سے معتبر پیشہ سے منسلک معلم قرآن کا سکیل ون تھا جسے ہماری حکومت نے گریڈ 7 تک کر دیا ہے،دیگر سپورٹنگ سٹاف کا گریڈ مزید بہتر کرنے کا بھی فیصلہ کیا ہے۔وزیراعظم آزاد کشمیر نے کہا کہ آزاد کشمیر میں ٹریفک کا نظام کنٹرول کرنے کے لیے ماضی کی حکومتوں نے کوئی توجہ نہ دی،ہماری حکومت ڈویژنل سطح پر ٹریفک پولیس کے سینئر افسران کی تعیناتی کر رہی ہے۔وزیراعظم آزاد کشمیر نے کہا کہ ہماری حکومت تمام شعبوں میں اصلاحات کر رہی ہے۔ ہمارا عزم ہے کہ ریاست کو فلاحی ریاست بنایا جائے جہاں عام آدمی کو سہولیات میسر ہوں۔ حکومت ہوٹر چلانے کا نام نہیں بلکہ عوام کی فلاح کا نام حکومت ہے۔وزیراعظم آزاد کشمیر نے کہا کہ صحافی حکومت کے فلاحی و ترقیاتی اقدامات کو اجاگر کرنے میں اپنا مثبت کردار ادا کریں۔صحافی کو حق حاصل ہے کہ وہ تنقید کرے مگر تنقید برائے اصلاح ہونی چاہیے۔صحافی ریاست کا اہم جز ہیں۔
اس موقع پر کشمیر جرنلسٹ فورم کے نو منتخب صدر خاور نواز راجہ نے وزیراعظم آزاد کشمیر کا تقریب میں خصوصی آمد پر شکریہ ادا کرتے ہوئے کہا کہ ریاستی عوام کی طرح صحافیوں کی آخری امید کی کرن بھی سردار تنویر الیاس خان ہیں۔نو منتخب صدر نے وزیراعظم آزاد کشمیر کو بلدیاتی الیکشن کے کامیاب انعقاد، رحمت اللعالمین ﷺ اتھارٹی کے قیام، 2600 سے زائد ایڈہاک ملازمین کی مستقلی سمیت دیگر دینی و فلاحی اقدامات پر انہیں زبردست خراج تحسین پیش کیا۔ وزیراعظم آزاد کشمیر نے تقریب کے اختتام پر سینئر صحافی سردار دلپذیر عباسی مرحوم سمیت دیگر مرحومین کے ایصال ثواب اور درجات بلندی کے لیے خصوصی دعا کی۔تقریب میں صدر نیشنل پریس کلب انور رضا،پارلیمانی سیکرٹری جاوید بٹ ،سیکرٹری اطلاعات انصر یعقوب، صدر کشمیر جرنلسٹس فورم خاور نواز راجہ،سابق صدر فورم زاہد عباسی،میڈیا ایڈوائزر ہمراہ وزیراعظم آزاد کشمیر سردار زاہد تبسم ،پریس کلب کے سیکرٹری خلیل راجہ،جنرل سیکرٹری فورم سردار عقیل انجم، رفعت اللہ بیگ سمیت صحافیوں کی ایک بڑی تعداد موجود تھی۔